ភ្នំពេញ៖ រដ្ឋមន្ត្រីក្រសួងយុត្តិធម៌ បានជំរុញឱ្យចៅក្រមទាំងអស់ពន្លឿនការដោះស្រាយលើបណ្តឹងកែតម្រូវអត្រានុកូលដ្ឋានដែលនៅសេសសល់ជាង៦ពាន់សំណុំរឿងឱ្យបានចប់នៅត្រឹមចុងខែមីនា ឆ្នាំ២០២៤។

លោករដ្ឋមន្ត្រីបានលើកឡើងនូវបញ្ហានេះឱ្យចៅក្រមដោះស្រាយ ក្នុងពេលលោកធ្វើជាអធិបតីភាពបើកសិក្ខាសាលាស្តីពីប្រសិទ្ធភាពនៃកិច្ចការនាំពាក្យព័ត៌មាន និងសាធារណមតិ សម្រាប់អ្នកនាំពាក្យ និងមន្ត្រីទទួលបន្ទុកព័ត៌មាននៃក្រសួងយុត្តិធម៌ និងសាលាជម្រះក្តី នៅបណ្ឌិត្យសភាភូមិន្ទយុត្តិធម៌កម្ពុជា នៅថ្ងៃទី២៤ ខែមករា ឆ្នាំ២០២៤។

លោករដ្ឋមន្ត្រីក្រសួងយុត្តិធម៌ បានណែនាំឱ្យចៅក្រមដោះស្រាយបញ្ហានេះឱ្យបានឆាប់រហ័ស ត្រឹមត្រូវ ពោលមិនត្រូវសម្រេចលើឯកសារណាមួយដែលខុសច្បាប់នោះទេ ជាពិសេសមិនត្រូវទាមទារផលប្រយោជន៍ណាមួយនោះទេ។

លោករដ្ឋមន្ត្រីបានប្រកាសនៅក្នុងសន្និសីទសារព័ត៌មាននារសៀលថ្ងៃទី០៩ ខែមករា ឆ្នាំ២០២៤ថា បើពលរដ្ឋមានបញ្ហាមិនប្រក្រតីនឹងរឿងអត្រានុកូលដ្ឋានដោយថាដោះស្រាយយឺត ឬទាមទារផលប្រយោជន៍ណាមួយ ពលរដ្ឋអាចប្តឹងមកខាងលេខាធិការដ្ឋាន៕